1Pe 3 | WSK | STEP | Jesus ko Nuet kuring bowa ningi bagakaso iwitatala, nina imet mu ninga nigari nobowa ningi bagaralko. Mu te nigari saki Kaem ko den me karo tusan, mu nenenga munan ningo umutang te nuna giris palagomonko. Nina den bo me nunga maonal agi,

1 Peter 3

Nuwus-kuari nunga den

1 Jesus ko Nuet kuring bowa ningi bagakaso iwitatala, nina imet mu ninga nigari nobowa ningi bagaralko. Mu te nigari saki Kaem ko den me karo tusan, mu nenenga munan ningo umutang te nuna giris palagomonko. Nina den bo me nunga maonal agi, 2 bare nuna nenenga namara taira diram nunguningkiri, kuring bowa ningi bagara umutang aringimon ale te giris palagomonko. ^{▼▼1 Peter 3:1-6 Imet nunga den: Mat 5:5; Eph 5:22-24, 33; 1 Tim 2:9-10; Titus 2:3-5. Sarah: Gen 18:2. Nuwus-kuari: 1 Cor 7.}

3 Nina kariimet te ningarkomonko ningimik guang nunga burangara, nemene pituwura mora, se kulolo bala yawara yawara tuguma, se guang ningo ningo katara, mu ko ikia tawun biya me ninga morukko. Mena. 4 Nina nengemang tuagu ningi bala yawara anirukko. Bala umutang mu bagara kutek am lila te, mu me ta menarukko, se umutang mu Kaem koma te mu am mel gira nunguningkiri.

5 Imet girakala Kaem ko nongomang ningi nunguning, mu munan umutang mu nononga bala iwita te nunumi bala tuikasan. Nuna kako nunguningkiri baga se nunga nugari nobowa ningi bagakasan. 6 Sarah butata bitakaso. Nu ko kuari kuring karo tui se arukaso “aga kari biya” makaso iwitata. Se nina nu turan munan ningo la beteral ale, anapeya ko me nguangaral, umutang mu nina noko nanawus ari ko iwita bagasan.

7 Se koma suwanta tala, nina kari niniwus ago, mu nina ninga imet arungu baga se mu iwita ikialko, nononga nosokel biyala nenenga nesokel tuar mena, bare nuna ago la nengerak Kaem ko munan se ko marak tamonko, iwita ikial, ale eng yawarakala nunga bitual ale nunga sinar talko. Umutang te nina ngatangaralko mu nina mel bo, ikia bo te me soraralko. ^{▼▼1 Peter 3:7 Kari nunga den: Eph 5:25-33; Col 3:19.}

Nanga bita maguwumon agi wore, munan ningo la bita se baganakko

8 Ani den imi nukum kalikko se iwita balsam, nina suen la ikia suwanta, nengemang suwanta te baga se, launuria ninimi ko kua se, ninimi sangaru se, ninimi ira kutuwural ale yawarakala lila te ninimi karogo bagaralko. 9 Nuna memek ningimik te betemon agi mu, nina koma ko me nunga bita maguwuralko. Ale den memek ninga manarmon agi mu, koma ko den memek me nunga maonalko. Mena. Marak den ningo la balu nungaralko. Mu awuk, Kaem marak ningo ningarukko balu se ninga giam se, borta ko nina den ningo la nunga maonalko. ^{▼▼1 Peter 3:9 Nanga bita maguwumon agi mu den ningo la nunga manornakko: Mat 5:44; Rom 12:17.} 10 Kaem ko batoga te balso iwitata:

“Awiriya tom udagi te bagara ningo arigok ale amilmil ago te bagurukko mu,
nu kuring te den memek me balukko,
ale kore sumulak te den kawel me aratukko.
11 Nu kilek memek buring tuok ale kilek ningo la bitirukko.
Nu lila te bagurukko sail tagirok ale saki arungu gomang suwanta te bagurukko.
12 Mu awuk, Kari Biya ko motam kariimet ningo diram mu nungarkiwoso,
ale nunga ngatangara ko dogowa guruguwoso.
Bare kariimet munan memek betesan mu Kari Biya buring gurugu nungarso ale memek nungarso.” ^{▼▼1 Peter 3:10-12 Psalm 34:12-16.}
13 Nina kilek ningo beteralko sail tagiral se mu ko awiri ninga bita maguwurok i? Mena. 14 Bare nina kilek ningo beteral se ko ninga bita maguwumon agi mu, am amilmilaralko. ^{▼▼1 Peter 3:14 Ikup nangarmon agi mu am amilmilanakko: 1 Peter 2:20; 4:14.} Nina me nunga nguangaral ale nengemang me namuruk tairukko. Mena. 15 Kristus mu nenenga Kari Biya umu ko ninguru ikialko. Nina nukote la loaga lagasan. Se umu ko awiriya ninga isok, mu nina aguwaya maonalko mu ningamin te ko iki se sinar ago lagaralko. Bare nu ko iki se munan te, ekes te maonalko. ^{▼▼1 Peter 3:15 Colossians 4:6 ago arikko.} 16 Kilek ningo diram mu la beteralko. Se mu te awiriya ninga bagara ningo Kristus te mu balu maguwumon, mu nononga den memek balman mu ko nongota dolomonko.

17 Kaem ko gomang ana munan ningo bitawanak se ko nanga bita maguwumonko agi mu, terong la. Bare ana kilek memek bitawanak se ko koma nanga bita maguwumonko, umutang ko ikia memek. 18 Mu awuk, Kristus nanga memek siwurokko kueram. Nu kari diram, bare nu ana kariimet memek wore nanga giok ale nangarak Kaem kote namurukko tom suwanta ko kueram ale anananga memek siwu saparam. Nu moman se kumik guang ago kueram. Bare Korang Bur nu marak sokel tuam se aking barasam.

19 Nu Bur umutang te la aking namaram ale kariimet ^{▼▼girakala Noah ko tom te Kaem kuring batagorman ale kueman se} nunga nodora talipara ningi anisan mu den nunga maonam. ^{▼▼1 Peter 3:19 Den imi ko ikia sang wetang te mena. English den te mu iwita: “in which also having gone he preached to the spirits in prison”. Bala bo mu iwita: .... ((Kari saki ikisan Peter “spirits” maso mu engel memek alo nunga balso.))
,} ^{▼▼Nu Bur umutang te la namaram ale engel memek alo talipara ningi anisan mu den nunga maonam.}

Noah dal kalowakaso se Kaem kam maiya biya kariimet giris palagomonko nunga kimi bitawakaso. Bare nuna ko kuring batagorman ale suen la yu lom biya mu ningi sarenga namaman. Se kariimet ilagalata, nunga tom 8 mu la, yu lom mu ningi me sarenga namaman, dal te yawarakala bagaman.

21 Se anuwa tata ko munan mu uwutata. Nina anuwa taman mu me sarenga namaralko, am yawarakala bagaralko. Bare anuwa tata mu ningimik guang ko karur te menawura ko munan bo iwita mena. Nina anuwa taman mu kausa bo, sang alo te aringimonko nina kilek memek nibiring tuman, giris palagaman, ale peleman Kaem ninga memek siwurokko kote taiman. Jesus Kristus kueram bare aking barasam umutang ko anuwa tata ninga sangarso. ^{▼▼1 Peter 3:21 Anuwa tata ko munan: Rom 6:4; John 3:5; Titus 3:5; Heb 10:22.} Nu duruk wonong te nama tarigiram ale Kaem ko kuting sengam mu te dagiwoso. Se engel bibiya nikim ago, nosokel ago, mu noko bowa ningi la bagasan.

22